西乙球隊馬略卡真係雙喜臨門！適逢馬略卡創會100周年，球隊班主之一、前NBA球星尼殊（Steve Nash），就趁機帶埋女友莉娜（Lilla Frederick）去西班牙旅行；兩人上周五仲喺社交網站，向一眾球迷宣佈佢哋訂婚嘅喜訊㖭。
適逢馬略卡喺當地時間三月五日創會100周年，作為班主之一嘅尼殊當然要去慶祝啦。呢位42歲前NBA球星，同女友莉娜歐遊玩足一星期，上周五終於抽到時間出席球隊操練，同班球員一齊練波，大騷腳法。尼殊鍾意踢波就係人都知，佢全程練習都笑笑口，唔通有得同班職業球員踢波過吓腳癮，令佢咁開心？
與排球女將譜「兄妹戀」
原來喺2010年同前妻Alejandra Amarilla離婚嘅尼殊，只係借球會「過橋」，趁機向細佢17年嘅莉娜求婚先係主菜；佢練完波就帶咗莉娜去拍拖，之後兩人同時喺社交網站上載咗一張莉娜戴住鑽戒嘅相，宣佈訂婚喜訊。莉娜就講咗少少求婚嘅過程：「我哋喺馬略卡嘅鄉村行行吓，尼殊突然向我求婚，我哋𠵱家訂咗婚喇！」而尼殊就直接得多：「佢話『我願意』！」25歲嘅莉娜樣靚之餘仲係排球猛將，佢之前就讀佩珀代因大學（Pepperdine University）嗰陣參加過排球隊，又代表過美國排球青年軍出賽，同尼殊都好登對；而且莉娜都有留意NBA，仲話最愛球隊係尼殊效力過嘅湖人㖭。
百周年心心波衫襯晒
馬略卡為咗慶祝創會100周年推出紀念波衫，仲喺噚晚迎戰奧維多嘅西乙聯賽着新衫，尼殊同另一班主沙華（Robert Sarver）都有入場睇波。望真啲，左胸位置仲印咗個心形圖案，真係可以一物二用，順便慶祝埋尼殊訂婚！