飲茶時候，餐飲M話太古廣場開幕時已經有嘅餐廳Dan Ryan已知道會結業，大概六月底就要搬走，呢間美國式家庭餐廳開業至今年有27年，幾奇怪左丁山從未去過，但身邊嘅洋人朋友人人都係DR嘅熟客，例如三十歲出頭嘅美國靚女J就話佢自細就跟爸爸去PP戲院睇戲，成家人多數在睇戲前後，在DR開餐，勝在距離戲院夠晒近；如靚女J者，在香港出生，爸爸來港逾40年，指DR與另一間意大利餐廳Grappa's都係太古廣場之老牌西餐廳，係佢地兩代expats嘅集體回憶，自細見到大，拍拖亦經常同男朋友幫襯DR或Grappa's。
冇咗DR，Grappa's會唔會冇得留低呀？大公關華德傳來一份網上資料，係屬於香港新聞快訊之類，其中一段嘅新聞係「Ciao Grappa's?」（再見Grappa's），指太古地產移走DR之後正在與G嘅控股公司傾新租約，有人傾向同樣移走G，引入新餐廳都唔定。大概太古地產內有高層唔喜歡有老招牌，係要引入新牌子啩。
餐廳M話據佢打聽所得，現時飲食界大紅人岳少旗下公司會進駐DR店，開辦另一間高級西餐廳，由Bombana（8½創辦名廚）負責，預料又係高價高檔義大利/地中海式餐廳。岳少近年憑雄厚財力，在飲食界大展拳腳，開創不少新名牌，如8½，好酒好蔡，China Tang, Hong Kong，夜上海及極高價錢日本料理等等，睇怕呢一次係以好優厚條件嚟說服太古地產送走DR，讓個舖位出嚟。DR雖然開業27年，賺足27年，但始終難與岳少嘅集團式經營競爭旺舖嘅。
至於Grappa's如果與太古廣場講再見，舖位又會益邊個呢？餐飲M話仲未知道，冇嘢講。Grappa's集團同系意大利餐廳Domani約兩年前被太古地產請走，改由太古集團旗下嘅酒店營運一間英式餐廳The Continental，開業以來，生意似乎與同集團嘅Cafe Grey有一段距離，唔算成功，太古要在餐飲方面打開局面，仍需努力。講起Domani，公關大哥L好客氣，新年請食飯，就去君悅酒店嘅大名店Grissini。睇風景就冇得彈嘞，食午餐無論湯、主菜、意大利濶條麵以及甜品，就令左丁山冇法子唔懷念Domani。在香港做餐廳，有自己舖位永遠最着數，好多人問占美廚房點解做咗幾十年仍在中環屹立不倒？答案好簡單，舖位係早年買入嘅！Dan Ryan以至Grappa's，租太古廣場，即使有熟客，有口碑，有歷史，最後都要被逼講Ciao。