速龍後衞迪洛桑（DeMar DeRozan）喺上周五嘅常規賽，帶領球隊險勝拓荒者117:115，更以罰球25投24中嘅出色表現，打破韋健士（Dominique Wilkins）單場連入23個罰球嘅NBA紀錄。
迪洛桑今場攻入38分，而且連入24個罰球，打破綽號「人類精華」嘅韋健士喺1992/93球季對公牛單場連入23個罰球嘅紀錄。其實迪洛桑有機會錄得罰球25投全中嘅紀錄，但佢話係隊友洛利（Kyle Lowry）阻止佢咁做！
險勝拓荒者冇「含淚」
因為當時比賽剩番0.9秒，而且拓荒者已經用晒暫停，假如迪洛桑射失呢球，對方即使搶到籃板都已經夠鐘完場。迪洛桑事後表示：「球隊冇逼我做任何嘢，而我只係想幫球隊贏波。」
雖然尼拉特（Damian Lillard）今場攻入全場最高50分，但就好不幸咁成為繼吉辛斯（DeMarcus Cousins）後，今季第二位單場攞到至少50分都要輸波嘅球員。速龍教練D基斯（Dwane Casey）都承認呢位拓荒者當家球星好難應付：「佢喺場上任何位置都入到波，好似史堤芬居里（Stephen Curry）咁射logo shot都得，我唔明點解佢今年落選全明星隊。」至於目前係自由身嘅後衞奇雲馬田（Kevin Martin），有傳已經同意加盟馬刺，希望為銀黑軍團力爭總冠軍。