個名叫正義聯盟，成員就個個都係超級英雄？八方就話未必。由李偲嫣牽頭嘅「正義聯盟黨」，去年先正式組黨，點知7個月後就發生內訌，日前兩個副主席拉埋班創黨成員開記招，齊齊向偲嫣BB追數，聲稱佢借錢唔還、虧空公款，最少借咗90幾萬，已經報咗警，仲即場宣佈開除佢黨籍呀陰公豬！
戴晒黑超口罩嘅C小姐係其中一個苦主，佢話自己「愛國愛黨」，前年12月參加撐警活動認識偲嫣BB，指控對方唔夠一個月就問佢借錢，聲稱有無國界醫生朋友喺外國俾人綁架要贖金，「自己都唔知點解會借，只係覺得佢係唯一一個可以幫到香港嘅人」，又話係「被正義沖昏頭腦」，前後借咗30幾萬，仲要係畀現金冇留底。
佢話偲嫣BB本來應承3星期內還錢，但結果有借冇還啦，仲喺撐警group唱C小姐勾引有家室嘅男義工。另一個義工Annie就話，捐過10萬蚊畀正義聯盟，由偲嫣BB現兜兜收，點知後來發現聯盟活動開支由義工夾錢，捐款不知所終，今次出嚟係想提大家愛國唔應該咁俾人利用。
黨成員張美芬知道呢件事後主動了解，發現唔少黨友同義工都有同類指控，於是組織債權人喺facebook group集體追數，點知偲嫣BB索性刪咗個group，搞一大輪先逼到佢喺律師見證下簽借據，但好多人到期都仲未收到錢。
副主席蔡克健就話查過黨嘅銀行戶口，冇見過任何一筆捐款，懷疑有人虧空公款，已向警方報案。警察公共關係科回覆話案件由油尖警區重案組第二隊調查，暫列「聲稱盜竊」，未有人被捕。八方打過畀偲嫣查詢，佢對指控回應話︰「梗係唔係啦，我還咗嗰啲佢哋有冇講吖？」