哥迪奧拿（左）今夏會接手曼城，但佢想帶過檔嘅拜仁慕尼黑球員唔係波蘭中鋒羅拔利雲度夫斯基或德國射手湯馬士梅拿，而係德國門將紐亞（右）先真。家陣幫曼城把關嘅雖則係英格蘭首席門將赫特，不過喺哥迪奧拿嘅足球理念入面，球隊需要好似紐亞一樣嘅「清道夫門將」，所以佢成為曼城主帥後嘅第一簽，極有可能係紐亞。消息話，月底30歲嘅紐亞同拜仁雖然仲有成三年幾合約，但據報曼城願意開30萬鎊（約330萬港元）周薪畀佢，搞到佢心郁郁。