喺新東補選取得6.6萬票嘅梁天琦，立即俾網民捧佢做本土派代表，話如果佢9月出戰立法會選舉，一定投佢一票，但正所謂人怕出名豬怕肥，梁天琦最近俾人喺網上貼佢食煙相，話公眾人物唔應該食煙，結果引起一場網絡大戰，點知呢單未完，又再喺高登轉貼佢之前接受端傳媒訪問嘅內容，話佢原來唔係純本土人，媽媽其實係內地新移民。
其實父母係咪新移民根本無問題，不過一班撐國師陳雲嘅本土網民，成日開口埋口話內地人來港生仔係殖民換血，當佢哋知道梁天琦媽媽係內地人就梗係反應大，但亦有撐梁天琦網民反駁，話總之佢撐本土就得！睇怕9月大選前，類似嘅本土內戰陸續有來。