NBA一哥勇士喺周四常規賽，喺傷癒復出嘅「咖喱仔」史堤芬居里（Stephen Curry）帶領下，主場以121:106擊敗西岸三哥雷霆，追平公牛嘅跨季主場44連勝紀錄；甲骨文球場被譽為「魔鬼主場」，果然唔係浪得虛名！
KD九次失誤成致命傷
今場傷癒復出嘅咖喱仔，射入全場最高33分，帶領球隊擊敗雷霆，追平公牛喺1994至96球季主場44連勝紀錄。咖喱仔好興奮咁話：「可以追平呢個紀錄，係對球隊嘅一種肯定。除咗一班球員之外，我哋嘅教練團，仲有一班粉絲都功不可沒！尤其係所有粉絲每場都好落力咁打氣，先可以令我哋擁有咁強嘅主場優勢。」另外，佢同勒邦占士（LeBron James）分別贏得東、西岸二月最佳球員，可喜可賀。
後備控衞利雲斯頓（Shaun Livingston）攞到11分亦係贏波功臣，佢話：「雷霆係好球隊，但勇士嘅板凳深度更有優勢，所有後備球員都會做好本份，幫球隊爭勝。」
雷霆當家球星杜蘭特（Kevin Durant）雖然射入32分，但就錄得今季第二高嘅單場九次失誤，難阻球隊喺六日內俾勇士雙殺；佢賽後好失望咁話：「我今場已經打得好落力，最後輸波真係令我好沮喪。我哋真係好想贏波。」