正當一眾建制派人士北上向阿爺請安、擦鞋、收風，喺香港嘅美國駐港總領事夏千福前晚亦都由金鐘北上，過海去到紅磡觀音廟借庫，其實今次已經係千福BB第三年去借庫，仲好罕有接受傳媒訪問，講明自己冇借庫，只係嚟睇吓。
熱愛香港本土文化嘅夏千福前晚約11點，以一身西裝冇打呔嘅裝束，去到觀音廟體驗借庫傳統。港人向神靈求財，一張紅紙億億聲，嚟自美國嘅佢覺得呢個傳統好特別，所以年年都嚟睇吓，但表明自己冇向觀音娘娘「借庫」，「我覺這是居於香港其中一個精采部份，我很高興來參觀，感激職員和廟方讓我入內。」夏千福亦喺元寶蠟燭店外逗留一會就旋風式離開，但截至昨晚，八方仲未見領事上載相片到facebook呃like。
粉嶺蜂場嘆檸蜜
除咗睇「借庫」，千福BB都好鍾意香港大自然，早幾日佢同同事參觀粉嶺一間蜂場，了解更多有關蜜蜂、蜜糖同香港本地製品，千福仲同三位女士一齊飲美味檸蜜。呢排夏千福似乎高調咗，但又有乜用呢？近日最令美領館關心、美方亦好想立法會通過嘅版權修訂條例終於作罷，所以話呢，外部勢力，香港立法會一樣未驚過。
李八方
mailto:[email protected]