有美斯，冇甩拖；巴塞隆拿周四西甲作客華歷簡奴，憑美斯連中三元，以5:1大勝，取得六連勝之餘，仲打破埋皇馬保持嘅西班牙連續不敗紀錄，聯賽又拋離番第二位嘅馬德里體育會八分，冠軍真係坐定粒六。
美斯禮讓 阿蘇宴客
雖然對手華歷簡奴只屬護級分子，巴塞都好認真，MSN組合美斯、蘇亞雷斯同尼馬有齊，22分鐘已經把握華軍門將桑卡路士派膠，由拿傑迪錫輕鬆射入空門，展開大勝序幕。一分鐘後美斯接應尼馬妙傳單刀建功，拋離2:0，主隊越踢越躁，後衞迪亞高洛蘭迪同中場伊度拉先後領紅出場，11個打九個，巴塞優勢更加明顯，美斯下半場再入兩粒，加上阿達杜倫埋齋，以5:1大勝，華軍都有安慰獎，前曼聯前鋒文路祖幫佢哋破蛋。
以眾凌寡，美斯原本大把刷數據機會，不過佢都唔自私，69分鐘巴塞有12碼，美斯讓畀蘇亞雷斯射，等佢擴大西甲神射手領先優勢，但阿蘇射門竟然俾桑卡路士撲出，而MSN另一拍檔尼馬亦黑仔，冇波入之餘，87分鐘仲拎黃牌，儲夠五張後下場聯賽要停賽。不過點都好，美斯連中三元後總入球增至19個，佢賽後亦都拎走個波留念，仲放埋上網同球迷分享喜悅㖭。
破皇馬不敗紀錄
自從上年10月3日不敵西維爾後，巴塞已經累積29勝六和，打破皇馬88/89年嘅不敗紀錄。國內無敵，巴塞都有機會挑戰歐洲紀錄，只要多一場不敗，就平AC米蘭90/91年不敗走勢，終極目標就係祖雲達斯嘅43場紀錄，而只要有美斯入波嘅比賽，巴塞已經累積連續56場不敗。雖然衞冕西甲冠軍在望，中場恩尼斯達都唔自滿，佢就話：「聯賽仲未完結，仍然有好多比賽，餘下賽事仍然要保持高度集中。」