都話咗亞視係永恒㗎啦，3點鐘話熄機，6點鐘又話救得番，搞到亞視大埔廠房外嘅八方同一眾「等死隊」行家不知所措。
不過都好嘅，起碼打不死嘅亞視噚日就製造咗一個商機。話說幾十個記者噚日守候喺亞視門口，身處偏僻嘅大埔工業邨，前不見村後不着店，由早上等到傍晚難免水盡糧絕。
就喺能量耗盡嘅一刻，救星到嘞，小販溫姐（圖）推住滿車冰鎮樽裝飲料到場，仲有熱騰騰嘅魚蛋、燒賣、炸雞翼供應，兼且價格相宜，吸引一眾記者行家馬上放下手上工作蜂擁幫襯。
溫姐話，自己平日專做單車友生意，睇新聞得知亞視門口有大班記者，馬上推車過來，果然有幾百蚊生意進賬。