「亞視永恒」終歸只係一首歌，最後都難逃熄機嘅命運。無獨有偶，一度短暫入主亞視嘅港視（1137）主席王維基（Ricky）噚日就正好喺facebook上面發表咗一篇題為《消失的舊科技》文章，入面講到「這個世界並沒有東西是永恒不變的」，咁啱夜晚就傳出亞視熄機。
Ricky喺前一日咁啱視察完將軍澳廠房地盤，華華見到半年前仍然係空地嘅地盤已經起好咗一大半，Ricky仲走入去自拍擺上網㖭。佢舊年曾經透露過，預計廠房可以喺2017年落成，仲講明唔排除到時會用嚟拍電影㖭。所謂一雞死一雞鳴，如今亞視熄機，會唔會令計劃有變呢？又或者咁講，可以開始變得更加樂觀？
另外，港視昨日股價喺3點之後一度升近兩成，創咗一個月嚟高位，未知係咪同亞視熄機有關呢？