四年前因特首選舉小桃園江湖飯局而聞名嘅「上海仔」郭永鴻，近來是非纏身潛水一排，噚日出版嘅《E週刊》就登咗佢一篇訪問。
身在日本嘅上海仔大爆自已係「國產凌凌漆」，由九七回歸至今，幫國家做咗好多嘢。
佢話1998年至2002年賈春旺做公安部長期間，自己經常同北京一位處長有聯絡，又經常同廣東省公安廳一名姓郭官員飲茶。
至於國家有乜任務畀佢，佢只肯透露曾經提供疆獨分子行蹤嘅反恐情報，其他詳情就唔方便講，總之就係幫手維持安定繁榮咁話。原來國家有咁多好幫手，唔怪得官媒都話，強力部門自有辦法。
上海仔又寸爆鄉議局計劃組黨，睇死新界人為咗土地利益明爭暗鬥，根本唔會團結。至於去年底佢遇襲後引起唔少風波，佢就話曾經同一位有勢力人士去澳門合作搞賭廳，點知最後因錢銀反面。至於曾宣佈開記者會爆料又突然取消，佢話因為知道有人會喺記者會搞事。