公民黨楊岳橋喺新東補選勝出，周三上任後即時加入拉布行列，要求點算法定人數，獻出立法會嘅第一次，點知民建聯蔣麗芸就喺fb稱岳少為「拉布怪」！噚日朝早，元秋同岳少狹路相逢（圖），二人喺議員休息室外短兵相接，作為新丁議員當然要上前打招呼，一向鬼馬嘅岳少自我介紹係「拉布怪」，搞到元秋唔知好嬲定好笑！
元秋成日抽水，有時都會抽着火水。好似噚日自由黨榮譽主席田北俊喺立法會回應港區人大代表譚惠珠挺梁言論，元秋剛巧路過，即時黐埋去同田少影相，點知聽聽吓唔對路，田少話如果打工仔做唔到嘢梗係要炒，比喻梁特表現差唔應該連任。元秋即時睥住田少，反駁兩句兼彈開，仲笑笑口叫記者唔好登佢哋合照喎。