前港姐冠軍陳庭欣（Toby）被雜誌踢爆四角戀，佢同港男冠軍翟威廉玩地下情係公開嘅秘密，不過陳庭欣係上月22號，被雜誌影到同有模特兒女友Candice嘅大狀唐偉倫拍拖睇戲，之後仲返咗大狀碧瑤灣屋企宿一宵，最鬼係陳庭欣嗰晚喺Ig貼咗一張準備瞓覺嘅相扮喺屋企，擺到明係心虛喎！報道又話原來Candice知道陳庭欣存在多時，仲話陳庭欣試過喺Candice面前同大狀攬頭攬頸㖭！
「係有睇戲」
噚日四角戀嘅兩位主角陳庭欣同翟威廉都有活動，翟威廉本來會出席無綫搞嘅藝員生日會，不過最後玩失蹤。至於陳庭欣噚日就喺將軍澳出席祝捷會，被追問有關於四角戀嘅事，佢話：「自己一直都好低調感情事，自己感情事冇特別改變過，同大狀係普通朋友，之前開餐廳係有問過對方意見，翟威廉係唔識佢，我同翟威廉係好好好好朋友。」陳庭欣承認同大狀有睇戲，佢話：「唯一正確係有睇戲，對方屋企開party，所以上去，絕對冇宿一宵。」
撰文：馮仁昭