公民黨楊岳橋贏咗立法會新界東議席，填補番佢嘅師傅湯家驊嘅空缺，於是立法會之議席分佈維持不變，令泛民暫時鬆咗一口氣。
根據選舉結果數字，傳統泛民參選人士，即楊岳橋、梁天琦及黃成智三人共得票244699票，佔總票數56.5%，民建聯周浩鼎得150329票，佔34.7%，方國珊得33424票（7.7%），粗略啲屈指一算，泛民/民建聯工聯會兩大陣營之得票比例，六與四之分，勉強可以保持得到。因為呢次補選實際上係單議席單票制選舉，兩大陣營勢力盡露，民建聯/工聯會及其同路人無論點樣努力，頂多只會取得四成多選票，難以超過五成。試比較吓，2012年立法會大選，在新界東選區，泛民得55%，選票有255546，建制派得37%，選票有172295，基本上與今次補選差不多。
但如用比例代表制計算席位，因本土派與泛民決裂，各不相讓，到咗今年九月，泛民與本土派好可能互相殘殺，益咗極精於配票嘅建制派。以2008及2012為例，08年泛民得票佔總數56.2%，得議席5（71.4%），建制派得票41.8%，得議席2（28.5%），而喺2012年，泛民得票55%，議席得6（66.6%），建制派得票37%，少咗4.8個百分點，議席有3，即33.3%，顯示配票很有效率，勝過泛民。
九月選舉，泛民分裂已成定局，預料溫和派仍可佔若干優勢，但激進派如梁國雄、陳志全、范國威三人的票源，基本上與本土派梁天琦重叠，一個不留神，便會被擠壓下馬。2012年范國威名單得票28621（6.2%），成為第9名新界東獲選議員，票王梁國雄名單得票48295（10.4%）排一名，以此推算，假如梁天琦參加九月選舉，今次他的得票66524票，即使流失一半仍然可以選贏上次排名第7的湯家驊（32753票），把范國威擠下馬。民建聯／建制派選票一眼望晒，今次全力為周浩鼎助選，得150329票，2012年四位建制派陳克勤、葛珮帆、葉偉明（工聯會）、龐愛蘭四人共得票135562，田北俊得票31016，顯見建制派已無多餘選票可用，必須全力研究如何更精妙地配票，才可擊敗四分五裂的泛民。一位新界東選民對左丁山說，梁天琦擺明係暴力激進派，仍可得15%選票，年輕人對政府之離心，大概已到了令北京吃驚的地步，假如梁振英政府不正視這問題，香港勢必分裂得更嚴重！