主場無敵手嘅馬刺，周三以97:81擊敗活塞，保持開季29場主場不敗，亦成為NBA今季第二支落實季後賽資格嘅球隊，連續19季都有得打季後賽，延續NBA紀錄。
馬刺靠第三節打出12:2嘅攻勢拉開，最終以16分擊敗活塞；小前鋒尼納特（Kawhi Leonard）攻入27分之餘，仲有五助攻六籃板。馬刺累積51勝9負，繼西岸一哥勇士後成為第二支確保季後賽資格嘅球隊，連續19季打季後賽亦延續NBA紀錄，計埋北美主要職業聯賽只係僅次於連續24季嘅NHL底特律紅翼。另外，上月俾塘鵝前鋒賴恩安達臣（Ryan Anderson）整傷「蛋蛋」嘅真路比利（Manu Ginobili、小圖）已經康復，醫生都批准佢上陣，不過就建議佢戴護陰。
