藝人黎明2009年以3,500萬元買入上水御林皇府單號屋，隔籬屋業主係前《華僑日報》創辦人岑才生個仔岑啟基，家陣將呢間實用逾三千呎屋仔放售，叫價5,300萬元。
翻查土地註冊處資料，間屋係於2005年用咗3,376.6萬元一手買入。岑啟基話，當年幫呢個盤做示範屋，見近高爾夫球場，就買來方便阿爸打波，周末來度假，家陣阿爸年事已高，少打波，屋少用，就想換貨。屋仔樓高2層5房4套連天台，維持當初歐洲hunter lounge嘅設計，話就話十年屋齡，但年年花錢維修，同入伙兩年無乜分別。
岑啟基被譽為「豪宅化妝師」，近年作品如信置（083）大埔天賦海灣1及2期洋房，「豪宅有裝修易賣好多，齋睇清水房好難畀人想像空間」。近來幫中海外（688）搞九龍塘新盤，年中就可以一睹佢嘅新作品。