噚日恒指略為調整，個股只係個別發展，二、三線中資股支持力比想像中強。不過，唔少強勢股已經升到去密集阻力區，包括中海油（883）、鞍鋼（347）之類，要再升就起碼要解決蟹貨同埋短線食糊盤，加上慎防近期流行假突破見光死，所以呢一刻唔建議喺呢個位強行參與。
講開中資股，晉佳比較關注喺兩會期間，李克強會唔會就設立超級監管機構統領一行三會而落墨。有料到嘅話，的確會令大家有番少少改革憧憬，因為呢個算係大手術，夠呃到吓人入市坐吓貨。不過呢，呢幾日主要炒得起嘅中資股，係同去產能相關，即係市場話畀大家聽，對於超級監管機構呢件事情，大家冇乜期望。
博中資股嘅話，寧願搵奇兵，如見部份已開車全購殼股回吐，距離全購價較貼近嘅，可考慮上車一坐。大陸𠵱家行緊外滙管制，內地資金嚟香港買殼嘅難度肯定增加。即使有朝一日，外滙管制問題雨過天晴，內地A股都會進行新股註冊制。所以，市場對於香港殼股需求很自然減少，長遠就冇咁多全購殼股出現。所以，投資者呢一刻應當好好珍惜已經蒲頭嘅全購殼股，短期內係細價股首選。至於其他細價股，當市況冇逆轉嘅話，見圖靚、剛起動、成交增，一試無妨。Number無謂重覆，你可以去睇隔離唐牛、魏力參考一番。
晉佳
https://www.facebook.com/advanceguy1/