劉錫賢在亞視服務了28年，由廣播道做到大埔總台，至大前日才忍痛引用《僱傭條例》10A條申請自動遣散，跟亞視一刀兩斷，昨日劉錫賢接受本報專訪時說：「亞視去到已經病入膏肓，而且佢𠵱家係極度痛苦，被德勤翻咗個底出嚟，得番廿幾萬嘅cash flow（現金流）喺度，𠵱家就算係掹掣都唔可惜，當然對佢有50幾年歷史，28年嘅感情，梗係會覺得好心傷、好痛。」
「股東對唔住員工」
被稱為「亞視忠臣」的劉錫賢，認為痛都應該選擇放棄，他說：「最近見到太多無賴嘅事發生，就算德勤話𠵱家好體諒，都應該有個方案畀我哋，炒晒你哋但係我哋唔出糧，你哋去勞工處追囉！呢樣嘢係完全冇辦法接受，由上次員工大會開始我嬲到𠵱家，所以我覺得佢𠵱家提早結束係啱㗎！」
對於堅持做到最後一刻的員工，他說：「我知道有好多員工有亞視情意結，話亞視不死，我都有講，我哋唔係對唔住亞視，只不過𠵱家呢班管理層同股東對唔住我哋呢班員工，係佢哋對唔住亞洲電視。我哋唔係跳船，只不過隻船開始沉，我哋係自保，唔通攬住隻船沉落水底，大佬！Titanic（鐵達尼號）啲人都走喇！」
■記者楊潔雯