立法會噚日繼續喺點算法定人數嘅鐘聲度過，人民力量陳偉業（大嚿）成朝要求點人數，佢亦都係今次版權條例拉布戰其中一個主力。原來噚日正係大嚿61歲生日，用咁嘅方式慶祝都算特別。八方問佢有乜生日願望，佢笑言：「願望係今日（昨日）流會啦。」長遠啲嘅願望，就梗係可以爭取到雙普選，同埋希望後生仔可以出入平安，即係抗爭時小心，唔好受傷佢就安心喇。講講吓，商經局副局長梁敬國正走來走去，搵議員返入去開會，大嚿趁機叫對方幫佢實現生日願望，早日流會，兩頭騰嘅梁副局苦笑，叫大嚿入去開會，最多佢請食飯喎。