前排，一位喺立法會上鬧爆香港政府無能，講中全港市民心聲嘅火爆姐（關穎怡）成為咗大家嘅英雄。要好似佢咁喺立法會上爆啲高官，啊！唔係，係發言，就要做足以下一連串步驟！
步驟一：先去到立法會網頁內「邀請各界提供意見書」頁面（ http://www.legco.gov.hk/general/chinese/sec/invite_s/invite_s.htm ），揀咗自己想發言嘅草案，填好「回條」，喺截止日期前傳真或者email番去小組委員會秘書，就完成申請喇！
步驟二：申請完都未必揀中你架，下一步就要喺截止日期後，打去相關議案委員會秘書嘅查詢號碼（相關草案「邀請各界提供意見書」網頁內可以搵到），睇吓中箴與否、發言人數以及發言時間。
步驟三：即使相關委員會接受你嘅申請，亦要通過重重難關先可以踏上火爆姐之路；到咗立法會，首先要通過安全檢查，就算檢查合格，但無法出示身份証明文件，亦不會獲准內進。
步驟四：入到會議場地，仲有十大規則要守，例如：要守秩序、展示訪客證、跟指示坐、電話唔開得、行李唔帶得、橫額唔舉得、飲食都唔得、影相（包括selfie）同埋嗌口號更加唔得！如果犯咗以上任何一條，而被警告無效，唔止會被帶離場，分分鐘要鬧到上警署㖭！
步驟五：雖然一班議員經常喺會議上開戰，言語上甚至含有兒童不宜，但曾經被裁定為具冒犯性及侮辱性的言詞都唔多，例如：「厚顏無耻」、「狗類」、 「狗奴才」、「仆街」當然走唔甩，不過連「拍馬屁拍着馬春袋」、「好像一條狗般四處咬人」呢啲比喻說話都中招！呢啲說話，大家就唔好講出嚟啦。難怪火爆姐都話：「今日我都無保障，仲同我講乜全民退休保障呀！」
記者：Karina
原曲：《烈女》
