《羅馬體育報》爆料話，碧咸大仔布魯克林同摩連奴囡囡瑪泰德（Matilde）拍住拖去英國Brit Awards慶功派對，但經證實係搞錯，嗰個根本唔係瑪泰德，而係布魯克林個表妹Liberty Isted。不過，布魯克林同瑪泰德都係名人之後，加上大家志趣相投都鍾意去星級派對，所以將來撻着成為男女朋友，真係一啲都唔奇。
意媒認錯表妹做摩女
日前《羅馬體育報》圖文並茂，指布魯克林同瑪泰德以情侶身份兼坐同一部車去參加英國Brit Awards嘅慶功派對，但好快就辳咗。輯相確係冇做過手腳，但原來相中個女仔唔係摩佬個女，而係布魯克林個16歲表妹Liberty先啱，兩個絕對冇嘢。不過布魯克林喺派對上，就不斷同前樂隊Oasis成員Noel Gallagher個女Anais Gallagher，以及英國明星仔Jemma McKenzie Brown咬耳仔，關係曖曖昧昧。查實《羅馬體育報》如果有做少少功課，應該知布魯克林同法國姐仔Sonia Ben Ammar拍緊拖，斷估布魯克林都唔夠膽咁明目張膽拖另外一個女仔去參加派對啩！
情史多過老竇啲獎牌
講開喺禮拜五就會滿17歲嘅布魯克林，雖然佢俾阿媽維多莉亞贒到實（據報碧咸嫂成日暗中調查布魯克林身邊啲女仔），但佢嘅情史仍然幾乎多過佢老竇碧咸啲冠軍獎牌。佢早喺2011年就被指同大過自己嘅地獄廚神Gordon Ramsay個女Megan拍拖。之後佢越大越識食，喺2014年被指追到喺電影《勁揪俠》（Kick-Ass）飾演紫天椒嘅嘉兒莫蕊茲（Chloe Moretz）；另外，同加拿大麻煩小天王Justin Bieber離離合合嘅美國23歲人氣偶像Selena Gomez，都同佢傳過緋聞，據聞仲因為咁而同嘉兒分手㖭。
雖則布魯克林家陣同Sonia拍緊拖，但後生仔女嘅嘢真係好難講，今日糖黐豆，聽日可能水溝油，所以佢第日真係有可能同瑪泰德發展都唔定。講真，布魯克林同瑪泰德嘅家庭背景好似，大家都有個球壇名人爸爸，加上佢哋都係Party Animal，所以若然喺埋一齊唔慌冇話題囉。