世界乒乓團體錦標賽噚日喺馬來西亞進行最後一輪小組賽,香港女子隊以3:1力壓小組最強對手南韓,以五戰全勝姿態取得D組首名出線,直入八強!
男隊飲恨今戰附加賽
港隊今仗面對賽前同樣四戰四勝嘅南韓,一定要贏先可以首名出線,直入八強。港隊派出杜凱琹打頭陣迎戰世界排名第13嘅削球手徐孝元,可惜佢面對削球稍為力有不逮,最終以0:3先輸一場。第二場港將李皓晴喺先贏一局11:7下,俾對手梁夏銀連追兩局反超前,但最後李皓晴憑拼勁連贏兩局,為港隊追平場數1:1。第三場大師姐姜華珺憑豐富經驗同穩定發揮,以3:1擊敗南韓嘅朴英淑,助港隊反先場數2:1。到關鍵嘅第四場,再度上陣嘅杜凱琹未有受首場敗仗影響,更先贏梁夏銀兩局11:6、11:8,雖然對手追番一局11:8,但越打越有嘅杜凱琹喺最後一局大炒11:1,幫港隊贏總場數3:1。
教練李靜賽後大讚一眾女將發揮出色:「佢哋最大嘅轉變就係鬥志提高咗。雖然杜凱琹對削球嘅心態唔夠定,但佢冇俾首場影響,第四場好好把握,調整方面做得唔錯。」另外,港男隊同日雖然喺小組賽壓軸一戰以1:3不敵南韓,仍然憑對賽成績力壓克羅地亞排小組次名,今日再同另一組第三名進行附加賽,爭入八強。(有線62及202台今日12:55pm直播)