「電訊魔童」王維基（Ricky）2012年賣走「親生仔」香港寬頻（1310），籌錢搞電視，大家以為香港寬頻從此欠缺「魔」力，不過Ricky中學同學、行政總裁楊主光（William）都有好多新搞作，用自己嘅方式繼續將公司發揚光大，凝聚員工士氣。
例如，香港寬頻會叫所有員工做「人才」；假期又多，前線人員17日年假，另加「家庭關顧假」同「入職紀念假」；每年兩次「全體人才大會」，當日連門市都唔開幾粒鐘，William會着成蘋果教主喬布斯咁，講解公司發展目標。
公司今年首個全體人才大會，將會喺將軍澳一間酒店宴會廳舉行，過去試過喺迪士尼樂園同海洋公園，等員工玩夠先開會，今次即管睇「楊布斯」有乜法寶。