上星期日，作為廠迷嘅小弟，理應全程追看住阿仙奴作客曼聯嘅英超大戰；不過，心繫立法會補選，睇完「曼阿戰」半場已經對愛隊心死，轉去睇大台嘅直播新聞台，結果就睇到禮義廉贊助嘅走馬燈點票廣告，簡單、實用又利民，真係大台德政。嗱，唔好又鬧大台利益衝突呀，呢個廣告同佢哋高層係前禮義廉成員，一啲關係都冇；仲有，唔好問點解有官方點票數字唔用要用禮義廉，眾所周知，禮義廉就係官方機構啦。大台已經皇恩浩蕩去訪問暴民候選人，暴民支持者竟然不識大體，大叫「是是但但」口號，你叫嘉欣BB情何以堪呢？
講番星期日兩場同時間嘅英超大戰，因為小弟對阿仙奴死心，下半場好多時間都係睇熱刺。唔係我誇口，小弟季初已經講熱刺係阿仙奴爭前四大敵，今時今日熱刺仲壓過阿仙奴，歷史性拎英超冠軍不是夢。同樣係落後，熱刺呢場波就反映到佢哋嘅決心；坦白講，反勝史雲斯唔係咩漂亮戰果，兩個入球都唔係特別靚，但起碼睇到領隊普捷天奴用人係講狀態，唔係講名氣；拉美拿、孫興民身價高，但踢得唔好一樣被調離場，結果查迪尼後備入替就攻入追平一球。
臨場應變能力真係好考領隊，普捷天奴就真係押中寶，而且佢用人態度都抵讚，重用迪利阿里同賴恩美臣等小將換嚟收成。咁阿仙奴領隊雲格呢？用人始終唯親，艾朗藍斯踢唔掂仲打足，禾仔擺明冇狀態；曼聯冇基斯史摩寧，雲格更加應該用基奧特強攻，但佢過份保守，抵輸，抵佢再次同英超無緣。
文：牽牛