今季英超冠軍爭持激烈，季前估都估唔到榜首兩隊會係李斯特城（藍衫）同熱刺。不過最後鹿死誰手，定係阿仙奴仲有力後上，似乎仲有排鬥；因為榜首李城喺周二率先失分，主場迎戰西布朗一度反超前下，都係俾對手以2:2逼和。其實李城都算叻仔，周二迎戰西布朗係佢哋喺今年第五場英超主場比賽，之前四場都保清白之身，成為2016年最後一支喺主場失波嘅英超球隊。李城喺今季餘下時間只係專注打英超，不過肯定唔易應付；領隊雲尼亞里就識為球隊減壓，話𠵱家最睇好熱刺可以奪標，因為佢哋攻守兩方面表現都咁掂喎。冠軍有排鬥，邊隊會成為第一隊降班嘅球隊睇怕就冇乜懸念。榜尾阿士東維拉喺周二又輸，主場1:3不敵愛華頓聯賽三連敗，班球迷都打定晒輸數，唔少人提早離場宣示不滿。