好多年前已傳過有歐洲豪門想飛起歐洲足協，脫離歐聯自組歐洲超級聯賽，實行有錢自己袋。五大英超球會雙曼、阿仙奴、車路士同利物浦嘅高層，周二獲邀喺倫敦一間酒店密斟，據講傾嘅就係打算另起爐灶。呢個會議係由美國有錢佬史提芬路斯發起，邀請英超豪門高層嚟倫敦，同前者嘅代表會面，話就話傾下季季前嘅國際冠軍球會盃事項，但英國《太陽報》就指，討論內容係商討脫離歐聯自己搞壇新賽事，老實講，搞咗幾年嘅國冠盃規模越嚟越大，大家有野心再搞大啲，搵多啲錢一啲都唔出奇。講開歐聯，睇怕下季冇份踢嘅車路士，近期戰績又好番啲，周二英超作客諾域治，藉羅拔堅尼地（16號）刷新今季英超最快入球紀錄，39秒就建功，以2:1擊敗對手。車仔英超三連勝，領隊軒迪克賽後就話下一目標係要追上曼聯喎。