這天日間氣溫顯著回升，不過一到夜晚又凍過，仲要係冷冰冰嗰隻，所指唔係天氣，而係賽馬結果。
這晚谷草一開場就爆近千元連贏，第二場變本加厲開出146倍大冷Q。到了第三場四班1650米情況依然，告達理馬房40倍之「感恩」在梁家俊胯下貼欄一放到底，力拒末段一眾追兵蜂擁而上，七歲老馬取得歷來第八捷，係告達理、梁家俊季內首度合作贏馬，組合獨贏A3派38元正。連贏搭「罕曾見」派一千二百幾，綠燈Q幫落飛黨贏番唔少。今場總時間1分43秒16極慢，比標準時間慢逾兩秒半。
「感恩」上次贏馬鞍上人為羅理雅，今場羅理雅幫方嘉柏騎「罕曾見」唔好彩，追足大半條直路，大外欄越衝越勁，可惜難越雷池半步，最終影相輸少少跑第二，「罕曾見」馬主鞋王Le Saunda老闆李子彬未能拉頭馬。第三名由雷景勳策騎沈廐「大勇士」奪得，呢位南非冠軍來港出任公司騎師後首度入圍，第四名乃柏寶座騎次熱門「恆駿寶駒」，四重彩派15萬幾。
告達理指「感恩」上仗沙田1400米只輸兩個多馬位，反映牠的近態不錯，今仗幸運地遇到超慢步速，令這匹放頭馬可成功偷雞。