喺大家樂（341）做咗超過30年嘅陳裕光，終於叫做退下火線。大家樂噚晚公佈，陳裕光將於4月1日起退任主席，不過佢又唔係全退，仍然保留非執行董事職銜。主席位就由現任首席執行官（CEO）羅開光接任，並將由執董轉做非執董。
64歲嘅陳裕光早於1984年加入大家樂，佢2012年轉任非執行主席之後，近年都好少出席大家樂活動，主要由羅開光擔大旗。
如今由60歲嘅羅開光升做主席，同佢有堂叔姪關係嘅羅德承，將會再上一層升做CEO。羅德承今年54歲，喺大家樂工作都有廿年咁耐，舊年升做副首席執行官嗰陣，市場都估佢有機會再升正，通告話佢基本年薪將有420萬元，未計花紅。