三年冇見嘅舊波友阿強早排又韌帶撕裂入「廠」，但上周喺觀塘工廈室內場踢老鬼波聚舊，竟然見到佢，「你好似第二次斷韌帶，仲嚟？唔驚咩？」「第二次？第四次喇！左腳已斷過三次……」我倒抽一口涼氣：「做完手術半年咋！咁快落得場？」「其實都得嘅……不過唔跑得……其實慢跑都得，不過唔跳得……所以我諗住嚟守吓龍咋！」
「跑得唔跳得」都忍唔住要嚟守龍，都知阿強為踢波可以幾盡！最終佢喺四人場守龍，都射入兩球。夠鐘離場，大家忍唔住問：「你仲偷偷嚟踢波，老婆唔嬲㗎？」「唔知咪唔嬲囉！今日特登戴金絲眼鏡，就係掩人耳目！不過第四次入廠，出院時佢真係嬲，唔畀我再掂足球，仲扔晒屋企所有同足球有關嘅嘢！波啦、波砵啦……」
波砵？你着緊呢對呢？「所以特登買對又紅又紫，等佢以為係去街波鞋！不過啲陳年波衫真係唔扔得，佢拎鉸剪嗰陣，我跪喺度求佢先保得住，𠵱家隱形眼鏡都唔畀我配！」
但冇咗幾個世盃現場買嘅足球，都好肉痛啦！「所以我第二晚走落垃圾站問阿姐，竟然執得番！一個擺公司Locker、一個放喺車內士啤呔個箱，當二奶咁收埋囉！」女士們，如你個老公似阿強，應該係高興而唔係嬲，因為佢嘅「二奶」唔會生仔同爭產，你亦唔會捉姦在床，最多捉姦在「場」箒！
文：方栢翹