拿玻里中場恩斯治尼（圖）真黑仔，事關佢日前被打劫，佢嗰陣揸住車，車入面仲有老婆同埋兩個朋友。喺等緊紅綠燈嗰陣，有架電單車停喺隔籬。坐電單車車尾嘅蒙面漢拎枝槍出嚟對住恩斯治尼，叫佢哋全車人拎晒啲貴重嘢出嚟；恩斯治尼嚇到面都青，畀晒啲名錶、珠寶同價值6,000幾蚊港紙嘅現金個賊。賊人似乎認得出恩斯治尼，臨走仲叫恩斯治尼喺禮拜一場比賽入個波送畀佢。恩斯治尼喺周一作客費倫天拿場波打正選，但佢就冇入到波，兩隊踢成1:1。