騎士要贏波，始終都係要靠「大帝」！上場缺陣嘅勒邦占士（LeBron James）喺周一迎戰溜馬嘅常規賽復出，即刻攻入全場最高33分，領軍以100:96贏波，幫騎士終止兩連敗嘅頹勢。
由於騎士教練路爾（Tyronn Lue）希望控制占士嘅上陣時間，所以後者喺周日作客巫師嘅常規賽冇落場，結果球隊就輸波。呢位騎士當家球星喺周一對溜馬嗰陣復出，當然希望幫球隊反底啦。不過，今場戰況相當緊湊，兩隊25次交換領先位置，仲有17次打成平手。
除咗占士拎到全場最高33分之外，T湯臣（Tristan Thompson）亦扮演奇兵；呢位後備前鋒喺最後39秒入波，幫騎士反超前，再喺最後17秒向溜馬後衞史塔基（Rodney Stuckey）送出一記封阻，令球隊保住勝局，個人就全場貢獻出「雙雙」嘅14分同11個籃板。占士賽後好滿意球隊嘅表現：「好彩我哋面對壓力都可以保持冷靜，無論攻守都打出水準，所以先會贏波。」
艾榮被爆唔happy想走
雖然騎士「三巨頭」之一K艾榮（Kyrie Irving）今場射入22分，包括罰球11投全中，係贏波功臣之一；但係據美國傳媒《ESPN》透露，呢位23歲控衞喺騎士似乎過得並唔開心，仲有啲想離隊他投㖭。占士亦有就呢件事作出回應：「我不時都會聽到類似嘅傳言，騎士𠵱家要為季後賽做好準備，呢啲傳言唔會影響到我哋。」
