近年有唔少追蹤「神級投資者」手影嘅網站同Apps出現，主要想畀一般投資者有多個參考，但係「股神」畢菲特似乎唔多like，甚至叫人唔好跟佢買股，要買嘅話，不如直接買佢旗下投資旗艦巴郡（Berkshire Hathaway）。
畢菲特日前接受傳媒訪問時話，投資者如果跟住佢，或者其他經常見報嘅頂級投資者去買股，咁就係大錯特錯，佢直指，模仿其他投資者並非最好嘅投資策略。按佢一貫宗旨，買股係一生一世嘅事，最勁嘅策略就係持續買股並長期持有，其間唔理佢哋股價升定跌。
股神承認最近幾個月市道麻麻，比較疲弱，但係巴郡依然係好友，不停買股。
咁佢又真係冇講大話，舉個例，雖然國際油價大跌，但巴郡近月就增持輸油管道公司Kinder Morgan，實行別人恐懼，佢貪婪。