前稱「福和」嘅綜合環保（923），2011年爆出懷疑有人穿櫃桶底之後，由新世界系創辦人鄭裕彤以股東身份接管，並交由乖孫鄭志明（Brian）打理。公司可能見未有太大起色，舊年中期業績仲蝕緊錢，新近搵來新世界集團老臣子林景生過去做首席營運總監，希望幫到手喇。
林景生早喺1993年已經加入新世界集團，曾擔任新創建（659）基建管理公司水務總經理同遠東環保垃圾堆填公司董事，喺國內基建同水務項目有超過20年經驗，加上佢係會計出身，除咗做生意之外，應該仲可以睇實盤數。
查實Brian做咗綜合環保主席後，已經替公司改名兼改logo，盡力幫間公司洗底，可惜舊年中期仲蝕5,380萬元。講到股價表現更加冇眼睇，噚日收報0.166元，全日成交100萬元都冇，似乎被股民遺忘了。