年逾60的吳定強是老牌練馬師，他旗下馬匹的馬主，亦大多是上了年紀的男士，惟獨「生菜」馬主阿Kei陳苡棋，卻是一位年輕少女。與阿Kay謝安琪一樣，這位阿Kei亦熱愛唱歌，陳苡棋曾是福音歌手，現在則有作品《歷奇》、《如呼吸般自然》等，去年五月底曾在一項音樂會中獻唱。
阿Kei的正職是甚麼呢？她說：「我係做家族貿易生意，做醫療設備給內地醫院，代理嘅機器做子宮頸瘤，有啲係做微創手術嘅！我幫爸爸(『生豪』馬主陳大枝)打理生意主要原因，是他已辛苦咁多年，但我唔知自己可以幫到幾多。」
為何阿Kei有興趣養馬呢？「生意上有很多內地客來香港到馬場應酬。那時我啱啱入咗馬會，爹哋就話，不如冇所謂啦，你又抽我又試吓抽，諗住買多一隻馬，我抽到就買咗『生菜』返來。點解叫『生菜』？一來想沿用之前爸爸『生豪』的『生』字，另外我喜歡食菜，生菜亦有生財的諧音。此駒是我跟上手練馬師方嘉柏一個親戚買的，價錢不方便透露，唔平唔貴啦。我都有投注，買馬多數都係十蚊咁玩，頂晒龍都係一、二百蚊玩吓，冇乜太多贏錢、輸錢經驗，純粹支持吓，捧吓，考驗自己嘅選擇能力有冇錯。」
阿Kei在養馬方面經驗唔多，始終唱歌才是她的強項。「唱歌我繼續學嘅，之前跟戴思聰學，現在跟佢個女唱。我有冇諗過樂壇發展？一直都有，都嘗試過，都好困難，或者我性格未必適合這個圈，競爭比較大，一切講機遇啦，繼續努力，唱好自己把聲先。」
阿Kei的歌手夢暫時仍在努力中，至於拉頭馬的願望，好像亦無法短時間內達成，「生菜」暫時跑了四次全無表現，但阿Kei卻說：「佢仲新仲嫩，其實佢幾有衝勁嘅，再warm up吓啦，吳定強話應該三月佢會好啲，會開始有好表現，其實佢係一隻好靚嘅馬，我有時入去探佢，餵佢吃紅蘿蔔，佢都好乖嘅！