恒生銀行（011）企業銀行部早幾日舉行春茗，除咗請客仔外，仲請到一位特別嘉賓，就係本港地產商御用律師行胡關李羅律師行嘅創辦人、年過80歲嘅律師關卓然，佢仲扮財神同大家一齊影相，十足十老頑童。
恒生人話，今次係銀行主動請關老扮財神，因為佢食過夜粥，又唱過粵曲，好有功架，襯得起套財神裝束，而且佢塊面圓碌碌，好有福氣，加上同恒生合作咗30幾年，所以請佢嚟玩吓，難得對方都係玩得之人。
胡關李羅律師行1973年成立，創辦人仲包括港交所（388）前主席李業廣，係長和（001）、新鴻基地產（016）、新世界（017）等大企業嘅法律顧問。關老亦由1999年開始，擔任新地非執行董事，至今有17年。