近排有一單壞消息，就係唔少企業延遲遞交聯交所IPO。回帶去上年9月下旬，當時港股跌緊，但仍然聽到中再保（1508）、華融（2799）同中金（3908）準備招股，預示短期後市唔差，所以港股就由9月底反彈到10月底，氣氛好轉，令三隻金融股順利喺10月底至11月初之間前後腳上市。
至於去到今日，港股跌到更低殘。可能因為內地進行外滙管制，或者係睇淡後市，想上市嘅企業都hold住唔搞上市，反映短線內冇水喉，冇靚價，冇運行。
近幾日中資股一日急升、一日急跌，證明情緒主導市場。港股喺無限壞消息同無限救市消息之下，市賬率浮沉於1倍左右，恒指游走於0.9倍至1.1倍之間，其實可以有4,000點波幅喺無基本因素改變之下出現。只不過，企業打退堂鼓唔上市，市場缺錢到呢個程度，會唔會有動力令恒指喺無基本因素改善之下，搶高2,000點，的確成疑。
恒指年初到𠵱家，似乎築成底部，少少似頭肩底，但頸線呈下傾，成交亦逐漸下跌，動力不足，呢一刻，寧願信傳統技術分析，反彈動力唔會多。
小弟近期發覺，唔少人開始對於日升日跌嘅波幅反應冷淡，但短線有突破的話，總會有一批反應稍快嘅短線友撲入去，博10月升市重現。不過，企業延遲IPO，客觀條件反映而家同上年10月有頗大分別。
晉佳
https://www.facebook.com/advanceguy1/