剛勝出立法會新東補選嘅公民黨楊岳橋，呢幾日真係好鬼忙，由早到晚穿梭不同電台接受訪問，而今日佢就會喺立法會大會宣誓，其後正式履行議員職責。
擬入兩個委員會
八方問過本身係大律師嘅岳少，佢話初步諗住加入司法同埋保安兩個事務委員會，之後會再入埋啲法案委員會。
查實岳少噚日朝早已經喺立法會大樓現身，使唔使咁鬼勤力？原來佢係專程視察一下佢喺立法會嘅辦公室，睇吓呢個未來嘅作戰竇口係點環境。入伙第一件事，梗係要搞好清潔先，份人都幾姿整嘅岳少，當然都要求乾淨，甚至唔介意變身清潔工，落手落腳抹埋自己張枱，確保一塵不染。八方所見，佢嘅議辦暫時仲係家徒四壁，相信遲吓會堆滿文件同書！雖然任期只得約半年，但嚟緊場場係硬仗，岳少都要做足功課嘞！
李八方
mailto:[email protected]