剛過去的長假期，我又去了我最愛的日本，今次是北海道滑雪兼shopping。勿以為北海道鄉下地方無好東西搜購，千歲Rera Outlet及北廣島市三井Outlet Park也足以消磨你兩天，即使在東京購物，我也習慣先行Outlet再行市中心Mall，一來價錢平得多，二來先執平貨再買正價貨，心理上會較易忍手。Outlet除了必備大部份的連鎖日牌，Rera的家品店也相當精采，shopping夠集中。
每次去日本，總會喜歡買帽，日本人愛戴帽，所以每間店舖都總有靚帽給你選擇，加上Outlet價，買得仲爽手。夏天去就買草帽，今次冬天去就買了兩頂紳士帽。對於不慣戴帽的朋友，黑色絨布的紳士帽確實是不俗的入門選擇，十分容易carry，牛仔褲、長裙、長褸、短褸也可配襯，一頂黑帽更是整個完美打扮的神髓。幾乎每間日牌舖都有黑色闊邊帽，剪裁靚的最平$100已有交易，找到一頂日本製都是約$300。其次是小朋友帽，設計更吸引，不同style的款式也有，價錢約$100-$150之間，我也忍不住手掃了三頂給囡囡。
記者：許維雅
攝影：徐振國
