舊年底中國9號健康（419）成功引入內地電影製作公司華誼兄弟、騰訊（700），仲有馬雲有份嘅雲鋒基金合組嘅財團做大股東，打算一齊合作食大茶飯，發展線下與線上文化兼新媒體業務。公司泊到新碼頭當然要改番個靚名喇。
公司噚日就宣佈，將會改名為「華誼騰訊娛樂」。呢個名真係改得好鬼懶，就咁將兩個新股東嘅名加埋一齊，直情好似人哋啲冠名贊助咁。不過咁樣都好，馬雲、騰訊近年分別入股咗多間上市公司，咁多冧巴好難記，公司名亦未必記到，呢個「華誼騰訊娛樂」，一望而知係呢兩間公司有份嗰隻，應該唔會炒錯。
翻查紀錄，呢間公司過去十幾年竟然改過5次名，由友利乜乜，到華億乜乜，𠵱家個名用咗大約3年，改埋今次，唔知仲使唔使改呢？