近年唔少富二代畢業後加入家族企業工作，好似利福國際（1212）老闆劉鑾鴻（細劉），佢位外形煞食嘅細仔劉今晨舊年底已返公司幫手，大女劉今蟾加入咗利福逾3年，噚日更獲委任為執董，未計花紅，年薪加董事袍金有140萬元。
劉今蟾今年28歲，2012年底加入利福，現任部門經理，負責國際品牌與銷售推廣。佢持有倫敦大學倫敦國王學院文學學士學位，之後去咗紐約哥倫比亞大學修讀文學碩士。細劉噚日講到寶貝女，只係輕輕帶過，話「個女入嚟冇耐，仲學緊嘢咋」，明顯係錫住佢喇。
至於27歲嘅劉今晨，佢持有哥倫比亞大學文學學士學位同紐約大學文學碩士學位，佢2011年至2013年曾經喺摩根大通做賓架，之後就去咗進修，舊年底返去利福。利福地產（2183）噚日亦宣佈，委任佢做執董，不計花紅，年薪加袍金130萬元。