日本企業為求革新，管理層收工冇得去居酒屋，而係轉場去學畫畫，實行一齊激發新思維！
呢類畫班由日本一間藝術中心負責，上堂地點係東京箱根溫泉區，每堂三粒鐘，對象係50至60歲嘅高層。
佢哋上堂要絞盡腦汁，事關要畫嘅題材都幾抽象。例如用七彩蠟筆喺畫紙上表達「增長」概念，仲要一小時內搞掂。高層完成大作後仲未可以落堂，仲有小組討論，要拎住幅畫同大家分享睇法，認真考起。
不過，好多參加過畫班嘅高層都話獲益良多，除咗激發創意，仲促進同事之間嘅感情。參加呢類畫班嘅日企，包括東洋鋁業、藥企第一三共、日立化成工業等。聽講呢股文藝風亦慢慢吹到美國同歐洲㖭。