立法會新界東補選塵埃落定，公民黨楊岳橋以一萬票力壓民建聯周浩鼎，力保該黨原有新東議席不失，亦守住泛民喺立法會地區直選嘅關鍵一席。有政界中人話若然多萬幾人投本土派，呢個位就拜拜，多謝部份激進泛民支持者大局為重撐岳少，但明言岳少個人魅力亦不可小覷，唔少陪同佢落區拉票嘅人都話，岳少女人緣非凡，老中青通殺，堪稱新一代政界女殺手。
粉絲爭相抱抱鼓勵
似噚日清晨喺調景嶺新聞中心咁吖，在場嘅公民黨黨魁梁家傑望到公眾席嘅場面都忍唔住講咗句，岳少嘅支持者，全部都係女性喎。傑少唔係葡萄啩？其實無綫《學是學非》兩位女主持，前日已經喺ig暗撐岳少，而為岳少助選嘅人，都話見證岳少魅力。
而噚日清晨約2時15分先到新聞中心嘅岳少，換番西裝官仔骨骨，冇再着競選風褸，連鬚都剃淨，青靚白淨番，據悉佢喺附近租咗酒店，投票結束後返咗酒店休息一陣就去新聞中心。
查實識岳少嘅人都知，佢份人較貪靚；商台節目主持人陳志雲昨晨都問到貪靚嘅岳少成日着西裝，若有衝擊行動會唔會方便？岳少笑稱冇諗過呢個問題，但強調：「我嘅西裝都唔係好貴，都係cheap嘢嚟，唔妨礙我嘅工作嘅。」
而昨晚岳少出動謝票，女粉絲戥佢開心嘅情緒就更見澎湃，除咗例必selfie，仲爭相抱抱以示「鼓勵」。不過，八方都想提醒一眾岳少女粉絲，佢名草有主㗎，但岳少噚日以私隱為由，唔透露女友對佢當選有乜反應。
李八方
mailto:[email protected]