周五晚和行家A閒聊，他說比起新上任的時候，近來定時定候打電話來吹水的記者少了許多，無他嘅，咁證明他忠於主子，沒有把是非當人情，吹吹吓，記者覺得冇乜風收，咪把時間投資在其他人身上囉。
但你問我，我最佩服A君這類公關，我能有幾口疏，決定權真不在我，既關乎法律責任、行業慣例、公眾利益，也和公司文化、企業發展和品牌策略關係至大。你口大大，鍾意走鋼線放料，寧願犧牲公司利益來討好記者，咁實受傳媒歡迎嘅，不過專業程度，就不敢恭維了。
傳媒要收風，企業何嘗不用，真的各師各法。
有資源豐富的公司會聘請各種專業的顧問，定期update管理層，也有人訂閱一些可能目標讀者只屬尊貴的三幾十人的特別報告，又有啲老闆責成各部門主管主動在外面收風，總之最好隔籬公司昨日高層會議講乜都報埋佢知！
但係做到好似美國海洋樂園SeaWorld咁，就有啲誇張，呢幾日美國最大的關公笑話就係SeaWorld終於承認， 動物權益組織PETA的指控是真的，佢哋真係派咗個人事部員工去組織做卧底，扮激進分子，一邊示威，一邊收風，嘩，無間道喎，為收風 ，果然去得好盡！PETA話呢個卧底唔簡單，成日鼓勵其他人激啲勇武啲，仲叫過人一把火燒咗樂園㖭！
被廣泛報道後，SeaWorld CEO只表示那名員工已被調職，言辭間也不覺鄭重致歉，企業和壓力團體之間關係之惡劣，可見一斑。
旁門左道，非Mary那杯茶，desk top research一下做分析、打幾個電話同行家索吓料冇問題，叫我為攞料做間諜，sorry，真的冇本事，下班後，真的只想睡一覺好！
彭瑪莉
mailto:[email protected]