雖則喺新界東補選中攞到多達15萬票，但民建聯周浩鼎始終都係敗選，佢可能會欲哭無淚，但網民就可能笑到好疲累。一如民建聯鍾樹根敗選區議會後，有網民去到佢議辦外慶祝一樣，一班市民就響應「東涌人」嘅facebook專頁號召，噚晚帶咗香檳去到位於東涌嘅周浩鼎區議員辦事處外慶祝佢落敗（圖）。當然，人數唔係好多，可能因為議辦位於東涌太唔就腳嘞。
互聯網噚晚流傳唔少網民慶祝嘅相片同短片，當中可見唔少在場人士高叫「踢走民建聯」，而過往敗選後嘅指定慶祝金曲，即係小鳳姐嘅《喜氣洋洋》、點會唔出場？熱烈地彈琴熱烈地唱，唔知周浩鼎又識唔識唱？