【汽車籽：軸芯人物】
《汽車引擎空轉（定額罰款）條例》實施後，每當盛暑，一眾搵食車司機頓時叫苦連天，只因停車熄匙沒了冷氣，實在難捱得很。保護環境人人有責，猶幸如今科技發達，魚與熊掌或可兼得，其實早在2010年，被譽為「港產電動車之父」的理大教授鄭家偉便研發出車用的太陽能冷氣系統。本可無痛熄匙，為何時至今日尚未普及？歸根究柢，因為科研乃長線投資，政府及商家均不願冒險，豈不令人扼腕嘆息。
儘管現時電能車被來自美國的Tesla佔據市場，但香港其實絕不落後，理工大學早於2001年開始設計電能車MyCar，並曾出售至英法等歐洲多國，現時亦有為車廠研發相關零件。但是理大的電力電子研究中心主任、電機工程學系教授鄭家偉卻並不滿足，因為電能車的發展和普及需時甚久，無法快速達成環保目標，「點樣將更多嘅環保元素加入車度，第一樣諗到嘅自然係加太陽能，因為車頂、車側都有好多位置加太陽能板。但太陽能所提供嘅動力唔多，車嘅摩打起碼要幾個kW（千瓦），太陽能只得幾百watt，唔夠推動成部車，所以只能夠推動一部份嘅零件，例如冷氣。」
別看輕冷氣系統，鄭教授指它的用電量非常大，「傳統用嚟製冷嘅壓縮機係以皮帶推動，所以動力會有限制，連車嘅變速都會冇咁好。尤其係停車嗰時會用好多油。而呢個太陽能冷氣系統嘅好處係，就算熄咗引擎，太陽能電池都會繼續供電，以行電嘅壓縮機嚟製冷，冷凍效果更好亦更慳油，而且毋須大幅改動車櫳。」當初的研發過程並不太長，基本設備只花了一年多的時間便完成，2010年更開始銷售至澳門、台灣及新加坡等地。
搵食車最多節省24%燃油
太陽能雖然環保，但要望天打卦，而且一般私家車經常出入停車場，採光時間較短，如何發揮效用？鄭教授坦言花逾5,000萬港元研發的系統是專為搵食車而設，即的士、小巴及貨車，「我哋用咗好多測試，發現小巴安裝咗之後，燃油慳咗17%，咁當然要睇番路線啦，最好見多啲太陽。曾經有小巴行吐露港，長時間喺太陽底下，可以慳成24%。至於喺市區行嗰陣，雖然多高樓大廈，但依然可以慳9%。」不過巴士則難以應用，因為空間太大，太陽能不足以推動它的製冷機。
節能效果不俗，至於充電時間則要視乎電池容量，例如小型貨車的100mAh電池，一般來說4小時便能充滿，而一般的士用50mAh電池即可。整個改裝費用約需兩萬，成本似乎有點高昂，而且始終要車內加裝額外零件，車主難免擔心內櫳會被改裝得亂七八糟，鄭教授指整個改裝並不影響任何設計。不過安裝之前，車主最好諮詢運輸署的意見，看看是否需要驗車，亦要向保險公司查詢，保障自己。
香港科研集資難 電能船更具效益
然而，在香港搞科研從來不是易事，站在前線的鄭教授感同身受，笑言自己有很多計劃，卻因未能獲得資金而難以進行，科研是長線投資，至少要５至10年時間，政府及商家都不願意投放大量資源。太陽能冷氣系統是少有由政府與業界共同出資研發的項目，但推廣又有另一問題，「為咗推廣，已經幫唔少車主免費安裝，不過單靠自己依然唔夠，要好多部門協助，例如政府部門容許我哋將系統裝喺佢哋啲車度，已經有宣傳嘅效果；或者舉辦停車熄匙活動，呢個系統已經可以派上用場。」
除了冷氣系統，鄭教授認為以電能推動的運輸工具，必然是未來的發展重點，若是針對香港環境，電能船更能有助環保節能，「喺香港，船嘅廢氣比車仲要多，因為艇嘅引擎大多數係歐盟二期，並唔環保，貨輪都係歐盟一、二期。你試諗吓，海上面咁多貨輪，又有駁艇等等，而呢啲艇又多數用柴油，仲要唔係靚油。重點係，一艘普通嘅駁艇或者運輸艇，如果由大埔運貨去鯉魚門，油費大約一千，如果轉用電能船，只要幾十蚊，不只環保，就連船主嘅荷包都慳番不少。」可惜，即使有整盤計劃，但鄭教授自2009年開始申請資金至今，仍然未能獲批，他也不清楚原因，或許有其他計劃比電能船更出色。創科局成立不久，香港的科研發展未知會否進步，但看到鄭教授的屢敗屢戰眼神，應該會有希望吧。
記者：梁立勤
攝影：徐振國
編輯：陳國棟
美術：楊永昌