奧斯卡金像獎，里安納度狄卡比奧終於贏得最佳男主角，不過最佳男配角爆冷，賽前橫掃多個大小頒獎禮的史泰龍大熱倒灶，從影逾四十年，三度獲提名都只能與小金人擦身而過，這就是命運。
賽馬亦一樣，有些馬非常恨贏，但屢次只能跑得接近，仍在苦等一場不知何時出現的頭馬。周三(2日)第五場四班1000米的「氣勢如虹」，對上一場頭馬已是2014年6月，之後經常跑得接近，數數手指接近兩年未贏，際遇只較史泰龍稍好。
今季初「氣勢如虹」曾在同程出擊，結果遇到「威先生」這匹伏兵，屈居亞軍。到上周三配高手莫雅執韁，亦只能在「海之濤」和「駿明珍寶」之後過終點，僅得季軍。
今次「氣勢如虹」相隔七日匆匆再出，換上莫雷拉，部署跟早前姚廄廄侶「迫擊炮」同出一轍，莫雅搏失換雷神即補中，「氣勢如虹」戰意鮮明，仲要抽到二檔，係咪贏梗呢？
睇形勢，「氣勢如虹」只忌一匹初出馬蘇廄「實力飛駒」，後駒晨課譽滿欄邊，三次試谷閘兩度勝出，前速銳利亦能貫注到底，最重要係轉急彎非常敏捷，這匹三歲早熟馬睇嚟進度良佳，面對咁強不明物體，唔通「氣勢如虹」又一次跟頭馬擦身而過？