高球名將「老虎」活士嘅前女友禾恩（小圖），喺上周六參加落山滑雪世界盃嗰陣發生咗嚴重意外，當時仲要人用擔架抬佢落山接受治療（圖），賽事亦一度因此暫停大約10分鐘；呢位31歲嘅「滑雪女王」事後就上載咗張相上社交網站報平安，話呢次意外令佢左膝骨裂，要喺周一接受磁力共振檢查之後，先知傷勢有幾嚴重。不過暫列積分榜首嘅禾恩，似乎就冇打算放棄比賽，佢之後搵枝巨型針筒，抽走膝頭嘅積水，仲話希望可以繼續出賽㖭。
