鬍鬚曾氣定神閒講掟磚，憑着愛，佢信有出路。雖然激進網民喊打喊殺鬧爆，左膠！和理非！係，做人係難，有時篤得多咖喱魚蛋，頂唔順，都要歎番一盅兩件、白粥炸兩、拿鐵牛角包，搞吓平衡。曾俊華比起一直泊住狼碼頭殺氣騰騰教訓年青人的林鄭和黎局長，真係清者自清，以身體語言宣示，各位，我係一個番書仔，唔識武鬥，喜歡歎吓咖啡食件手工cup cake過日辰。官員或多或少都係離地一族，港英培養出來，優渥得唔知世界艱難。但過去三年，官仔骨骨埋唔到狼堆，一個個一直自豪於港英管理上層優雅風格的高官，自甘墮落，與狼共舞，舞姿是那麼不堪入目的大媽style，路人皆見，影舞者竊笑，香港雖然未沉，但樣衰到這個程度……真係未見過！
保溫暖壺是竊聽器，哦，換了曾俊華怎麼回應？一定推薦紀x鳳畀周星馳，撈番個肥花角色！這邊廂譚耀宗撥火，叫曾俊華唔好以為超然得過狼老闆。民x聯明明聞到狼屁股着火的燶味，但輪唔到自己上位，眼見曾俊華鬆毛鬆翼，酸到上心口。
政治一日都嫌長，磚頭和暖壺忽然擁有特異功能，本地創科有望，明年初一，周街007！