大阪飛腳（藍衫）新一季真係唔係好順，噚日喺日聯首階段首場比賽，主場輸俾鹿島鹿角0:1後，連埋之前喺日超盃輸俾廣島三箭1:3，同埋喺亞冠盃打和水原藍翼0:0，今季踢咗三場比賽都未贏過，教練長谷川健太應該會捉班球員去照照肺。話時話，後備落場三分鐘就幫鹿角入致勝球嘅19歲前鋒鈴木優磨，上季喺聯賽上陣七場入咗兩球，表現經已相當搶鏡，今季一開波佢就做咗鹿角嘅贏波英雄，睇嚟之後大把世界，相信教練石井正忠會畀更多機會佢一展身手。